БОБОХОНОВ Рустам Сатторович

БОБОХОНОВ Рустам Сатторович, олим – агроном, доктори илмҳои кишоварзӣ, профессор, Аълочии маориф ва илми Тоҷикистон. 16-уми марти соли 1967 дар ноҳияи Файзобод таваллуд шудааст. Солҳои 1974-1984 дар макбаи миёнаи №1 ноҳияи Файзобод таҳсил намудааст. Соли 1984 муҳасилини Ҷамъияти ихтиёрии артиш ва флоти баҳрии ИҶШС буд. Солҳои 1984-1985 ба сифати коркари бригадаи механиконидашуда дар хоҷагии молпарварии ноҳияи Файзобод фаъолияти меҳнатӣ намудааст. Солҳои 1985-1987 хизматро дар сафҳои қувваҳои артиши мусалаҳи ИҶШС дар шаҳри Смоленск анҷом додааст. Солҳои 1987-1988 ба сифати барқчӣ дар фабрикаи мурғи марҷонпарварии ноҳияи Файзобод фаъолият намудааст. Соли 1993 факултети боғдорӣ ва биотехнологияи кишоварзии Донишгоҳи аграрии Тоҷикистон ба номи Шириншоҳ Шоҳтемурро хатм намудааст. Дар давоми солҳои 1993-1996 дар Донишгоҳи аграрии Тоҷикистон ба номи Ш. Шоҳтемур ба ҳайси муаллими кафедраи технологияи нигоҳдорӣ ва коркарди маҳсулоти кишоварзӣ фаъолият намудааст. Солҳои 1996-1999 аспиранти кафедраи физиологияи наботот ва биотехнологияи кишоварзӣ буд. Дар давоми солҳои 1999-2005 ба сифати муаллими калон, дотсент, мудири кафедраи технологияи нигоҳдорӣ ва коркарди маҳсулоти кишоварзӣ ва ҳамзамон солҳои 2001-2003 ҷонишини декани факултети агробизнес, 2005-2009 ҷонишини декани факултети таҳсилоти ғоибона, иҷрокунандаи вазифаи ноиби ректор оид ба таҳсили ғоибона, 2009-2010 ҷонишини декани факултети боғдорӣ ва биотехнологияи кишоварзӣ, 2014-2016 директори маркази баҳодиҳии сатҳи дониши донишҷӯёни Донишгоҳи аграрии Тоҷикистон ба номи Ш. Шоҳтемур кор ва фаъолият намудааст. Аз соли 2016 то 2020 профессори кафедраи технологияи нигоҳдорӣ ва коркарди маҳсулоти кишоварзӣ ва аз соли 2020 то ба имрӯз профессори кафедраи сифат ва бехатарии маҳсулоти ғизоии Донишгоҳи аграрии Тоҷикистон ба номи Ш. Шоҳтемур мебошад.
Фаъолиятҳои илмӣ: Соли 1999 рисолаи номзадии худро дар мавзӯи «Таркиб ва фаъолнокии рибулозо 1,5 – бисфосфат – карбоксилазаҳо / оксигеназаҳо дар растаниҳои солимгардонидашудаи картошка дар вобастагӣ ба ҳосилнокии онҳо» ва соли 2016 рисолаи доктории хешро дар мавзӯи «Баланд бардории маҳсулнокии картошка бо истифода аз усулҳои пурзӯркунандаи аксуламалҳои мутобиқшавии раcтаниҳо дар шароитҳои номусоид (стрессӣ)» дифоъ намудааст.
Фаъолиятҳои илмии ӯ ба масоили парвариши картошка ва нигоҳдорию коркарди маҳсулоти соҳаи растанипарварӣ равона шудааст. Аввалин маротиба аз ҷониби ӯ дар шароитҳои гуногуни хоку иқлими Тоҷикистон дурагаҳои ояндадор, ки ба шароити хушкӣ тобавар буда, ба баландшавии ҳарорати ҳаво бе талафоти ҳосилнокии баланд мутобиқ мебошанд, ошкор карда шудааст. Вай ҳаммуаллифи навъи картошкаи «Академияи илмҳо-1 ва як патент мебошад.
Таҳти роҳбарии ӯ аспирантон ва магистрон оид ба масъалаҳои гуногуни парваришу нигоҳдории зироатҳои кишоварзӣ корҳои илмӣ анҷом додаанд, ки онҳо дар баланд бардоштани истеҳсоли маҳсулоти кишоварзӣ ва амалӣ гардидани Барномаи амнияти озуқаворӣ аҳамияти калон доранд.
Осори илмӣ: профессор Бобохонов Р.С., муаллиф ва ҳаммуаллифи бештар аз 100 асару мақолаҳои илмӣ, 10 дастур ва 8 китоб, аз он ҷумла, Технологияи нигоҳдорӣ ва коркарди маҳсулоти кишоварзӣ, Душанбе, 2007; Технологияи нигоҳдории меваҷот ва сабзавот, Душанбе, 2011; Калориянокии маҳсулоти ғизоӣ, Душанбе, 2011; Технологияи умумии консервакунонӣ, Душанбе, 2011; Луғати мухтасари имлоҳои технологияи нигоҳдорӣ ва коркарди маҳсулоти кишоварзӣ (тоҷикӣ-русӣ), Душанбе, 2011; Луғати мухтасари имлоҳои технологияи нигоҳдорӣ ва коркарди маҳсулоти кишоварзӣ (тоҷикӣ-русӣ-англисӣ), Душанбе, 2011; Нигоҳубин, ҷамъоварии ҳосил, коркарди баъд аз ҷамъоварӣ, нигоҳдорӣ ва коркарди маҳсулоти боғдорӣ, Душанбе, 2011; Асосҳои илмӣ-амалии технологияи нигоҳдорӣ ва коркарди маҳсулоти кишоварзӣ, Душанбе, 2012; Технологияи коркарди меваҷот ва буттамеваҳо, Душанбе, 2016; Технологияи хушконидани меваҷот ва сабзавот, Душанбе, 2017; Ҷамъоварӣ ва нигоҳдории себу нок, Душанбе, 2019; Молшиносӣ ва ташхиси меваю сабзавот, Душанбе, 2020; Технологияи нигоҳдори имеваҷот, буттамеваҳо ва сабзавот, Душанбе, 2022 ва ғайра мебошад.